Racionet e ushqimeve dhe sjellja në mënyrën e të ushqyerit

PSIKOLOGJI
Typography

Është e rëndësishme të ushqehemi në mënyrë të vetëdijshme dhe të llogarisim kaloritë që marrim. Shpesh herë konsumojmë sasinë që na ofrohet, edhe pse mund të mos jetë ajo që i korrespondon nevojave tona ose konsumojmë në mënyrë të tillë që humbasim kontrollin e të ushqyerit, duke sjellë si pasojë kilet e tepërta.

Si mund ti kontrollojmë racionet e ushqimeve në shtëpi? 

·         Vendoseni racionin tuaj në një pjatë dhe mos hani direkt nga tenxherja ose qesja ku mund të jetë e paketuar.

·         Shmangni ngrënien para televizorit ose gjatë kohës kur jeni të angazhuar me punë. Kushtojini rëndësi asaj çfarë hani, përtypeni ushqimin mirë, si dhe shijoni aromën dhe shijen e tij. Shpeshherë harrojmë se çfarë dhe sa hamë, sidomos nëse vëmendja jonë nuk është e përqëndruar tek ushqimi që po konsumojmë.

·         Hani ngadalë, kështu që truri juaj të arrijë të marr mesazhin që stomaku juaj është tashmë plot.

·         Ndaloni së ngrëni kur e ndieni se nuk jeni më të uritur. Shumë njerëz janë mësuar të çohen nga tavolina pasi janë “fryrë” nga ushqimi. Kjo është diçka e gabuar, sepse do të thotë që ju keni konsumuar më shumë ushqim nga sa keni nevojë.

·         Përdorni pjata, tasa dhe gota të vogla kështu që mund ti mbushni ato me sasi më të vogla. Zakonisht ne e perceptojmë si racion gjithë sasinë që na është servirur në pjatë, pavarësisht se sa mund të jetë ajo.

·         Kur gatuani në sasi të mëdha, pjesën që mbetet vendoseni në frigorifer. Në këtë mënyrë ju nuk do të josheni për ta ngrënë të gjithë ushqimin duke përdorur si justifikim “mos të shkojë dëm”. Për më tepër, do të keni ushqim gati edhe për një ditë tjetër.

·         Gatuani sasi të vogla ushqimesh – është më e preferueshme (në kohën tonë) të mos dali ushqimi se sa të mbetet, pasi në rastin e parë mund ta mbyllësh vaktin duke konsumuar një frut, ndërkohë në rastin e dytë mund të konsumoni atë që ka mbetur pa e patur të nevojshme.

·         Mundohuni të konsumoni rregullisht ushqime të shëndetshme. Nëse humbët një prej vakteve ose keni qëndruar për orë të tëra me stomakun bosh ka shumë gjasa që të konsumoni sasi më të madhe ushqimi në vaktin tjetër.

·         Kur blini snacks, zgjidhni ato me sasi të vogël duke u siguruar që kanë sasi të ulët të kalorive.

·         Zëvendësojini ushqimet (snacks) që kanë sasi të lartë të kalorive si patatinat, pijet freskuese etj, me ato që kanë më pak kalori si kosi, frutat, biskota me drithëra etj.

 

Si mund ti kontrollojmë racionet e vakteve kur ndodhemi jashtë shtëpisë?

Është më e preferueshme ti përgatisim ushqimet tona në shtëpi se sa të hamë jashtë, pasi kështu mund ti kontrollojmë më mirë sasitë. Megjithatë, ka disa mënyra të zgjuara për të kontrolluar sasinë e racioneve edhe jashtë shtëpisë:

·         Ndajeni ushqimin tuaj, porosisni gjysëm racioni ose meze ose sallata për të shmangur një vakt të plotë. Për shembull, një sallatë fshati ose sallatë me ton ose sallatë me pule e shoqëruar me një fetë bukë përbën një vakt të plotë.

·         Kërkojeni gjysmën e vaktit ta merrni të paketuar për në shtëpi, kështu mund ta konsumoni atë në një vakt tjetër.

·         Ndaloni së ngrëni kur ndieni që jeni ngopur. Për pjesën tjetër të kohës gëzojuni pranisë së shoqërisë në të cilën ndodheni.

·         Shmangni pijet freskuese në paketime të mëdha pasi përmbajnë kalori të shumta dhe të padobishme. Preferoni të pini ujë, sodë, ose ndonjë pije të lehtë në sasi të vogël dhe pa kalori.

 

Kur do të udhëtoni, paketoni dhe merrni me vete fruta, perime, kos, biskota me drithëra, si dhe zgjidhni ujë në vend të pijeve freskuese.  Një zgjedhje e mirë si snack janë edhe frutat e thata dhe arrat por tregoni kujdes në sasinë që do të konsumoni pasi ato janë të pasura me kalori. Nëse do të uleni në restorant porosisni sallata, peshk, perime të ziera dhe i shoqëroni me ujë. Nëse zgjidhni ushqime “më të rënda” si patatet e skuqura dhe pica, preferoni ti merrni ato në sasi të vogla.